Մոսկվայում բնակվող հայ աղջիկներն այնպիսին են, ինչպես Երևանում, իսկ Մոսկվայից մի 40 կմ այն կողմ՝ այնպիսին, ինչպես գյուղում

Հոկտեմբերին հանդիսատեսի դատին կհանձնվի երիտասարդների կողմից նկարահանված հերթական ֆիլմը՝ «Մարոն» անունով: Ֆիլմը լիամետրաժ է, ժանրը` կատակերգություն: Նկարահանումները կատարվել են Լոռու մարզի Լեռնապատ գյուղում,  Դիլիջանում, Գորիսում, Արցախում, Դսեղում, Երևանում: Ֆիլմի ստեղծման, գաղափարի, կերպարների մասին ASEKOSE.am-ի թղթակիցը զրուցել է ռեժիսորի և սցենարի հեղինակ Րաֆֆի Ղազարյանի և դերակատար Մարինա Պողոսյանի հետ:

Րաֆֆի, կխնդրեի խոսեիր ֆիլմի գաղափարի մասին:

-Ֆիլմը 70  տոկոսով հիմնված է ռեալ փաստերի վրա: Հիմնականում ներկայացնում է մերօրյա աղջիկների մտածելակերպը, որը իմ կարծիքով շատ սխալ է, քանի որ նրանք մտածում են միայն գեղեցիկ զգեստների, զարդերի , հարուստ տղաների,  մեքենաների մասին:

Ֆիլմի միջոցով ցանկանում եմ ցույց տալ, որ բացի այս ամենը գյուղում էլ կյանք կա և կարելի է սիրահարվել նաև ոչխար կամ կով պահող տղայի:

Իսկ ինչո՞ւ «Մարոն»:

-Մարինե անունը գեղեցիկ է, ըստ իս: Չգիտեմ ինչու՝ Երևանում այդ անունով աղջիկներին Մարիշ են ասում: Նրան տանում են գյուղ և դառնում է Մարո, ինչպես և կոչում են նրան գյուղի բնակիչները:

Տեղյակ եմ, որ ֆիլմում հայտնի դերասաններ չկան, ինչո՞ւ:

-Դերակատարների ընտությունը պատահական է եղել, իսկ հայտնի դեմքերի չենք ընդգրկել ֆիլմում, անգամ դերակատարների մեծ մասն այդ բնագավառում մասնագիտացած չէ: Ինձ թվում է, նրանք, ովքեր մասնագետներ չեն, դերն ապրելով են խաղում:

Յուրաքանչյուր ասելիք թիրախին հասցնելու համար նախ դու պետք է ապրես, տեսնես: Ֆիլմում  ներկայացվող գյուղական կյանքը  լսածների, թե՞ տեսածի հիման վրա է:

-Ես ապրել եմ այդ միջավայրում: Դերակատարների մեծ մասն էլ Երևանից չէ. Լոռիից, Գյումրիից են, չնայած ունենք նաև Վրաստանից և Մոսկվայից:

Մարինա, Մոսկվայից ես եկել և ֆիլմում քաղաքից գյուղ ես գնում՝ ապրելու: Իրականում կգնայի՞ր այդ քայլին:

-Չէ, ես քաղաքի կյանքին սովոր եմ, ես չէի կարողանա կով կթել-մթել:

Եթե համեմատես Երևան-Մոսկվա-ՀՀ որևէ գյուղի աղջիկներին: Նմանություն կամ տարբերություն տեսնու՞մ ես:

-Գիտեք, Մոսկվայում բնակվող հայ աղջիկներն այնպիսին են, ինչպես Երևանում, իսկ Մոսկվայից մի 40 կմ այն կողմ՝ այնպիսին, ինչպես գյուղում: Շատ բան ընտանիքից է կախված: Այնտեղ դեռ ասում են օրինակ վերցրու հայ աղջիկներից, իսկ այստեղ…

Րաֆֆի, ինչ ես կարծում, ֆիլմը որևէ ազդեցություն կունենա՞:

-Միգուցե: Գոնե կսկսեն մտածել, որ շքեղությունից այն կողմ սեր կա, իսկ այն ամեն ինչ է:  

                                                                                               Հարցազրույցը՝ Անի Կարապետյանի

http://asekose.am/hy_AM/news/9/134340-moskvayoum-bnakvox-hay-axjiknern-aynpisin-en--incpes-ereanoum--isk-moskvayic-mi-40-km-ayn-koxm-aynpisin--incpes-gyouxoum.html