Պուտինը` Խաղաղության Նոբելյան մրցանակի թեկնածու

ՌԴ նախագահ Վլ. Պուտինին առաջադրել են 2014 թվականին Խաղաղության Նոբելյան մրցանակ ստանալու համար: Այս մասին հայտարարել է նորվեգական Նոբելյան ինստիտուտի տնօրեն Հեյր Լունդեսթադը` նշելով, որ 2014 թվականին Խաղաղության Նոբելյան մրցանակի համար առաջադրվել է ռեկորդային` թվով 278 թեկնածու, որից 47-ը կազմակերպություններ են: 

Նոբելյան հանձնաժողովի անդամները երեկ քննարկել են Ղրիմի հարցը, Վենեսուելայի ու Թայլանդի հակակառավարական ակցիաները, և ցուցակում ընդգրկել  են իրենց թեկնածուներին: Պուտինից բացի, թեկնածուների թվում ընդգրկվել են նաև Հռոմի պապ Ֆրանցիսկոսը, պակիստանցի ակտիվիստուհի Մալալա Յուսուֆզայը, ԿՀՎ-ի նախկին աշխատակից Էդվարդ Սնոուդենը.փոխանցում է  Reuters-ը:

Հիշեցնենք, որ դեռևս 2013 թվականի սեպտեմբերին Կրթության համառուսական հիմնադրամն առաջարկել է ՌԴ նախագահ Վլադիմիր Պուտինին Նոբելյան մրցանակ տալ։ Հիմնադրամի նախագահ Սերգեյ Կոմկովը Նոբելյան հանձնաժողով ուղարկած իր նամակում ընդգծել է, որ Խաղաղության մրցանակին Պուտինն արժանի է, քանի որ լինելով աշխարհի առաջատար երկրներից մեկի ղեկավարը՝ ուժերի ներածի չափով ջանքեր է գործադրում ողջ աշխարհում խաղաղության պահպանման համար։